Pages

Saturday, February 24, 2007

တန်ဖိုး

၀၅.၀၇.၀၆ ရက်နေ့တုန်းကရေးခဲ့ဖူးတဲ့ အက်ဆေးလေးတစ်ခုပါ။ ကျောင်းမှာ တုန်းက သူငယ်ချင်းတစ်ယောက် ကျွန်တော်လက်စွပ်ဝတ်တာကို အဲဒီ့အက်ဆေးလေးထဲကလို ကဲ့ရဲ့ခဲ့ဖူးပါတယ်။ အဲဒီ့အချိန်တုန်းက ကျွန်တော်တွေးမိတာလေးတွေကို ပြန်သတိရပြီး ရေးဖြစ်ခဲ့တာပါ။ ဖတ်ကြည့်ပြီး
ဝေဖန်ကြပါဦး။ ဒီအက်ဆေးလေးထဲက အိုင်ဒီယာလေးနဲ့ပတ်သက်ပြီး ကျွန်တော် ဒီ့ထက်ပိုပြီး ရေးချင်ပါသေးတယ်။ ဥပမာ ... တိုင်းပြည်ကိုကာကွယ်သူတစ်ယောက်ရဲ့လက်ထဲက သေနတ်တစ်လက်နဲ့ တိုင်းပြည်ကိုဖျက်ဆီးနေသူတစ်ယောက်ရဲ့လက်ထဲက သေနတ်တစ်လက်တို့ရဲ့ တန်ဖိုးမတူညီဘူးဆိုတာမျိုးပေါ့ ...။

တန်ဖိုး

ကျွန်တော် ၈တန်းကျောင်းသားဘ၀တုန်းက မေမေမွေးနေ့လက်ဆောင်ပေးထားတဲ့ ရွှေလက်စွပ်လေးကိုဝတ်ပြီး ကျောင်းကိုသွားခဲ့ဖူးပါတယ်။ ဘာရယ် ညာရယ်မဟုတ်ပါဘူး ... လက်စွပ်လေးကလဲ ကျွန်တော့်ရဲ့ဘယ်ဘက်လက်သန်းကြွယ်မှာ ငြိမ်ငြိမ်လေးနေနေသလို၊ ကျွန်တော်ကလည်း သူ့ကိုသိပ်ဂရုမစိုက်မိခဲ့ပါဘူး ...။ ဒါပေမယ့် ... ကျွန်တော့်ရဲ့ လက်စွပ်ကလေးကို ဂရုစိုက်မိတဲ့ သူငယ်ချင်းတစ်ယောက်က ကျွန်တော့်ကိုပြောပါတယ်။
[ ငါတို့လိုကျောင်းသားတွေအတွက်တော့ အဲဒီ့ရွှေလက်စွပ်ဟာ ဒီဘောလ်ပင်တစ်ချောင်းလောက်တောင် တန်ဖိုးမရှိပါဘူးကွာ ...]
သူ ဘာသဘောနဲ့ပြောတယ်ဆိုတာ ကျွန်တော်နားမလည်ပေမယ့် ... သူ့စကားကြီးက သိပ်သဘာဝမကျဘူးလို့ခံစားလိုက်မိပါတယ်။ ကျွန်တော် သူ့ကိုဘာမှ ပြန်မပြောဖြစ်ခဲ့ပါဘူး။ ဒါပေမယ့် ... စိတ်ထဲမှာ စဉ်းစားမိတာက ...
[ ဒီလက်စွပ်နဲ့ ဘောလ်ပင်တစ်ချောင်းလိုချင်ရင် အချိန်မရွေးလဲယူလို့ရနိုင်တယ် ... လက်စွပ်ကိုလိုချင်ရင်တော့ ဒီဘောလ်ပင်နဲ့ လဲယူလို့မရနိုင်ဘူး ] လို့ ...
အဲဒီ့နေ့မှာပဲ အဖြစ်အပျက်တစ်ခုဖြစ်ခဲ့ပါတယ် ...။ ကျွန်တော်တို့ ကျောင်းဆင်းချိန်မှာပါ ...။ မိုးတွေကသဲကြီးမဲကြီးရွာချနေတယ်။ ကျောင်းဝင်းအပြင်ဘက်ကို ကျွန်တော်တို့ရောက်ရောက်ခြင်းမှာပဲ စူးစူးရဲရဲ အော်သံတစ်ခုကို ကြားလိုက်ရလို့ လှည့်ကြည့်လိုက်တော့ ... ကလေးငယ်တစ်ယောက် လမ်းပေါ်စီးနေတဲ့ရေတောထဲမှာ ငိုယိုအော်ဟစ်လို့ ...။ ကျွန်တော်တို့တွေ အပြေးအလွှားသွားကြည့်တော့ ရေတွေဖုံးနေလို့ မမြင်ရတဲ့ ချိုင့်ထဲကိုနင်းမိပြီး ခြေထောက်ခေါက်သွားလို့ ကလေးရဲ့ခြေထောက်ကြီးက ယောင်ကိုင်းနေတယ်။ လဲအကျမှာ လက်ထောက်လိုက်လို့ထင်ရဲ့ လက်ဖျံမှာလဲ လက်ငါးလုံးလောက် ပွန်းပဲ့သွားပြီး သွေးသံရဲရဲနဲ့ ...။ ကလေးကလည်း ငို၊ ကလေးအမေရဲ့မျက်နှာကိုကြည့်တော့လည်း ဇီးရွက်လောက်ပဲရှိတော့တယ် ...။ အဲဒါနဲ့ပဲ ကျွန်တော်တို့ ကားတစ်စီးကို အမြန်တားပြီး ဆေးရုံသွားကြမယ်လို့ပြင်တော့ ... ကလေးအမေက မျက်နှာငယ်လေးနဲ့ပြောတယ်။
[ ပိုက်ဆံမရှိဘူး ...] တဲ့။
အဲဒါနဲ့ ကျွန်တော်လဲ သူတို့ကိုဆေးရုံပို့ထားခဲ့ပြီး ... နီးစပ်ရာအပေါင်ဆိုင်တစ်ခုမှာ လက်စွပ်လေးကိုသွားပေါင်လိုက်တယ်။ ရတဲ့ငွေနဲ့ လောက်လောက်ငငဖြစ်သွားတော့မှ ကျွန်တော်တို့လဲ စိတ်အေးရတော့တယ်။ ကလေးအမေကလည်း ကျေးဇူးတင်စကားတွေ တဖွဖွပြောရင်း ပိုက်ဆံကို တနည်းနည်းနဲ့ ပြန်ဆပ်မယ့်အကြောင်းတွေပြောတယ်။
[ ရပါတယ် အန်တီ၊ ပြန်ပေးစရာမလိုပါဘူး ...]
အားလုံးပြီးဆုံးသွားတဲ့နောက်မှာ ... ကျွန်တော်တို့သူငယ်ချင်းတစ်စုလည်း ဆေးရုံပေါ်ကဆင်းပြီး လမ်းမပေါ်ကိုပြန်ရောက်လာကြတယ်။ မိုးက အခုတော့ သူမဟုတ်သလိုပါပဲ ...။ မနက်တုန်းက ကျွန်တော့်ရဲ့လက်စွပ်လေးနဲ့ပတ်သက်ပြီး ဘောလ်ပင်တစ်ချောင်းလောက်တောင် တန်ဖိုးမရှိဘူးလို့ပြောတဲ့ သူငယ်ချင်းက ကျွန်တော့်ကို ပြန်ပြီးတောင်းပန်တယ်။ ကျွန်တော်က ဘယ်လိုမှသဘောမထားပါဘူး။ ဒါပေမယ့် ... သူ့ရဲ့အမြင်တွေရှင်းသွားအောင် စကားတစ်ခွန်းတော့ပြောဖြစ်ခဲ့တယ်။
[ အရာဝတ္ထုတစ်ခုရဲ့တန်းဖိုးဆိုတာ သူ့ရဲ့ပိုင်ရှင်က သူ့ကိုဘယ်လိုအသုံးချသလဲဆိုတဲ့အပေါ်မှာပဲ မူတည်တာပါကွာ ...]

နေဘုန်းလတ်

4 comments:

Yan said...

ကြိုက်တယ်ဗျာ…အတွေးအခေါ်ရော၊ ရေးသားတင်ဆက်ပုံရော ကျစ်လျစ်တယ်၊ သိပ်သည်းတယ်။ ဆက်လက်ကြိုးစားပါဗျာ…

Yan said...

ဒါလေးကိုကြိုက်လို့ Forum ရဲ့ Novels Corner မှာ တင်ထားချင်ပါတယ်။ ခွင့်ပြုပါခင်ဗျာ…

http://myanmarbloggers.forum5.com/viewtopic.php?p=598&mforum=myanmarbloggers#598

NayPhoneLatt said...

Thanks for ur support, fri.

Anonymous said...

really cool post..