Pages

Monday, September 17, 2007

တောင်ရောက်မြောက်ရောက်အလွမ်းများ (၁)

စင်ကာပူနိုင်ငံမှာ အလုပ်သွားလုပ်ခဲ့တုန်းက ရေးထားတဲ့ အက်ဆေးလေးပါ။ သံလွင်အိပ်မက်မှာနဲ့ သောင်းပြောင်းထွေလာမဂ္ဂဇင်းတို့မှာ ဖော်ပြခဲ့ဖူးပါတယ်။ မဖတ်ရသေးတဲ့ သူငယ်ချင်းတွေအားလုံးအတွက် ကျွန်တော့်ဘလော့ဂ်လေးမှာ တင်ပြလိုက်ပါတယ်။ အထူးသဖြင့် စင်ကာပူနိုင်ငံ မှာ အလုပ်သွားလုပ်နေတဲ့ ညီငယ် မောင်ပွတ် အတွက် အဓိက ရည်ရွယ်ပါတယ်။ နိုင်ငံရပ်ခြားကိုရောက်နေကြတဲ့ လူငယ်တွေအားလုံး ပတ်ဝန်းကျင်အသစ်တစ်ခုကိုရောက်နေချိန်မှာ စိတ်ပျက်အားလျှော့မနေပဲ ငါတို့နိုင်ငံနဲ့ ဘာတွေများကွာခြားလဲ ငါတို့နိုင်ငံအတွက် ဘာတွေများအတုယူစရာရှိလဲ ဆိုတာတွေကို လေ့လာနေပြီး အခါအခွင့်သင့်တဲ့အခါ ကိုယ့်ရဲ့အတွေ့အကြုံတွေနဲ့ ကိုယ့်နိုင်ငံရဲ့တိုးတက်ရာ တိုးတက်ကြောင်းကို တစ်တပ်တစ်အား ၀ိုင်းဝန်းဆောင်ရွက်နိုင်ကြပါစေလို့ ဆန္ဒပြုပါတယ်။


``တောင်ရောက်မြောက်ရောက်အလွမ်းများ (၁)´´

ကမ္ဘာ့မြေပုံရဲ့တစ်နေရာမှာ ခြေထောက်လေးတစ်ချောင်းထောက်ရင်း ဟိုယိမ်းသည်ထိုးနဲ့ ခပ်ကြော့ကြော့လေးရပ်တည်နေတဲ့ မြန်မာဆိုတဲ့နိုင်ငံမှာ နှစ်ဆယ့်လေးနှစ်ခွဲလောက် ဟိုတိုးသည်ဝှေ့နဲ့ ကြီးပြင်းလာခဲ့တဲ့ ကျွန်တော် အခုတော့ စင်ကာပူဆိုတဲ့ နိုင်ငံငယ်လေး တစ်ခုရဲ့ သိပ်မကျယ်ဝန်းလှတဲ့ မြေနေရာတွေပေါ်မှာ ခြေချမိနေပါပြီ။ မွေးကတည်းက ရင်နှီးကျွမ်းဝင်ခဲ့ရတဲ့ မြန်မာတို့ရဲ့ အငွေ့အသက်တွေ က ကျွန်တော့်အာရုံတွေထဲမှာယှက်သန်း ကျွန့်တော်ရဲ့နေ့ရက်တွေတိုင်းမှာ အလွမ်းတွေကသိုက်သိုက်ဝန်းဝန်း ပေါ့... ။ အချိုမြိန်ဆုံး အကြင်နာမေတ္တာတရားတွေနဲ့ ရစ်ဖွဲ့နှောင်ပတ်ထားတဲ့ မိသားစုဆိုတဲ့ အသိုက်အ၀န်း လေးတစ်ခုကို ခွဲခွာရပြီး ဝေးမြေရပ်ခြားတစ်နေရာမှာ ဘ၀အတွက်ရုန်းကန်လှုပ်ရှားနေကြရတဲ့ သူတိုင်းရဲ့ အဆိုးဝါးဆုံးသော ဝေဒနာကတော့ အဲဒီ့အလွမ်းတွေပါပဲ။ ကျွန်တော်ကလည်း လူတွေထဲက လူတစ်ယောက် ဖြစ်တဲ့အပြင် ခံစားချက်တွေကိုရှေ့တန်းတင်တတ်တဲ့ အနုပညာသမားတစ်ယောက်မို့ ဝေးကွာခဲ့ရတဲ့ အရာတွေအားလုံးကို လွမ်းပြီးရင်းလွမ်းလို့နေတာပေါ့ဗျာ။
အားလုံးသိနေကြပြီးဖြစ်တဲ့ ( Homesick)ဆိုတဲ့ အိမ်ကိုလွမ်းတဲ့ရောဂါအကြောင်းကိုတော့ ကျွန်တော်ထွေထွေထူးထူး ပြောမနေ ချင်တော့ပါဘူး။ ကျွန်တော်ပြောပြချင်တာက စင်ကာပူကိုစရောက် ကတည်းက ကျွန်တော့်ရဲ့ရင်ထဲမှာ မှိုလိုပေါက်ပေါက်လာတတ်တဲ့ တောင်ရောက်မြောက်ရောက်အလွမ်းတွေ အကြောင်းကိုပါ။ စင်ကာပူမှာ ကျွန်တော်တို့နေတဲ့နေရာက လေယျာဉ်ကွင်းနဲ့နီးတာကြောင့် မနက်အိပ်ရာနိုးတာနဲ့ ပထမဆုံးစကြားရတာက တ၀ူးဝူးနဲ့ ထထပျံနေကြတဲ့ လေယျာဉ်တွေရဲ့အသံပါပဲ။ ကျွန်တော်ဖြင့်လေ ပြူတင်းပေါက်ကနေ ကောင်းကင်ပေါ်ကိုတ၀ူးဝူးအသံပေးပြီး ပျံတက်သွားကြတဲ့ လေယာဉ်ကြီးတွေကိုကြည့်ငေးရင်း မြန်မာနိုင်ငံအရပ်ရပ်က အားလုံးကိုလှုပ်နှိုးနေကျ နှိုးစက်တွေဖြစ်တဲ့ ကြက်ဖတွန်သံ၊ အုန်းမောင်းခေါက်သံနဲ့ ရထားဥသြဆွဲသံတွေကို တမ်းတမ်းတတကိုလွမ်းနေမိတယ်။ ကျွန်တော့်ရဲ့အလုပ်က ကားတစ်တန်၊ ရထားတစ်တန်နဲ့သွားရတာမို့ ပထမဆုံး ကားဂိတ်ကိုပြေးပြီး ဘတ်(စ်)ကားစောင့်ရတယ်။ ဘတ်(စ်)ကားဆိုလို့ စင်ကာပူနိုင်ငံမှာ ဘတ်(စ်)ကားစီးရပုံလေးပြောပြဦးမယ်။ (e-z Link Card) လို့ခေါ်တဲ့ Card လေးကိုစင်ကာပူဒေါ်လာ ဆယ့်သုံးကျပ်နဲ့ဝယ်ရတယ်။ အဲဒီပိုက်ဆံကုန်သွားရင် အဲဒီ့ကဒ်ထဲကိုပဲ ATM (Automatic Ticketing Machine) လို့ခေါ်တဲ့အလိုအလျှောက်ငွေဖြည့်စက်လေးတွေမှာ ပိုက်ဆံကိုထပ်ဖြည့်လို့ရတယ်။ အဲဒီ့ကဒ်နဲ့ ဘတ်(စ်)ကားရော၊ ရထားရောစီးလို့ရတယ်လေ။ ဘတ်(စ်)ကားပေါ်တက်ပြီဆိုတာနဲ့(Ticketing Machine) လေးတွေမှာ အဲဒီ့ကဒ်လေးတွေကိုသွားပြီးကပ်လိုက်ရုံပဲ။ ကျွန်တော်လဲကားပေါ်ရောက်တာနဲ့ လွတ်နေတဲ့နေရာတစ်ခုမှာဝင်ထိုင်ရင်း စိတ်တွေကရန်ကုန်ကိုပြန်ရောက်သွားတယ်။
``ဘားလမ်း ... ဆူးလေ ... မော်တင် ... အပေါ်လမ်း ... အပေါ်လမ်း ...´´
``စိန်ပေါလ်ရောက်လားဟင် ...´´
``ကားခလေးတွေလှမ်းမယ်နော် ... လက်တို့တောင်းရင်ရှက်ဖို့ကောင်းတယ်´´
``ခုဏက နှစ်ယောက်ခပေးပြီးပြီလေ ... ဘာလာကြောင်နေတာလဲ´´
``အထဲမှာအချောင်ကြီးနော် ... အထဲဝင်စီးပါ ... အပေါက်ပိတ်မရပ်ကြပါနဲ့ဗျာ ... ဒီအပေါက်ကလေးနဲ့ လုပ်စားနေရတာ´´
``ချောင်ရင် မင်းကိုယ်တိုင်ဝင်တိုးပါလားကွ ... လာ ... လာ ´´
``အကြွေလေးတွေဆောင်ထားမယ်နော် ... ထောင်တန်ပေးရင်မနက်ဖြန်မှပြန်အမ်းမယ်´´
``ဟဲ့ ... ငါးဆယ်တန်ပေးထားတယ်နော် ... ရှေ့မှတ်တိုင်ဆင်းမှာ ... ´´
``ဆွဲ ဆရာရေ ဆွဲ ... နောက်ကားဝင်လာပြီ ...´´
``ဟဲ့ ... ဟဲ့ ... ဖြည်းဖြည်းလုပ်ပါ ... ဒီမှာတက်နေတုန်းရှိသေးတယ်´´
ရန်ကုန်ဘတ်(စ်)ကားတွေပေါ်က စပယ်ယာတွေနဲ့ခရီးသည်တွေရဲ့ အပြန်အလှန်ပြောစကားတွေကို ပြန်ကြားပြီး ကျွန်တော်တစ်ယောက်တည်းပြုံးနေမိတယ်။ စင်ကာပူမှာ ဘတ်(စ်)ကားစီးရတာ တကယ့်ကို ပျင်းစရာကြီးပါဗျာ။ တကယ်ပါ ... ပျော်စရာလည်းကောင်း၊ စိတ်ညစ်စရာလည်းကောင်းတဲ့ ရန်ကုန်က ဘတ်(စ်)ကားတွေနဲ့ စပါယ်ယာတွေကို ကျွန်တော်လွမ်းနေမိတယ်။ ဆင်းမယ့်မှတ်တိုင်နီးလာတော့ တိုင်မှာ ကပ်ထားတဲ့ ခလုပ်လေးကိုနှိပ်လိုက်ရင် ဒရိုက်ဘာအနားက (Bus Stopping)လို့ရေးထားတဲ့မီးလေးက အသံမြည်ပြီးလင်းလာတယ်။ ဆင်းပြီဆိုရင်လည်း (e-z Link Card) လေးကိုပြန်ကပ်ပေးလိုက်ရုံပဲ။ အဲဒါဆို အဲဒီ့ (Ticketing Machine)လေးကကိုယ်စီးလာတဲ့မှတ်တိုင်ရဲ့အကွာအဝေးကိုတွက်ပြီး သူ့ဖာသာသူ ပိုက်ဆံဖြတ်ယူထားလိုက်ရော။ (Air-con) ဖွင်ထားတဲ့ကားပေါ်ကနေအဆင်း အပြင်မှာလည်းနေက ပွင့်နေတာကြောင့် ကျွန်တော့်မျက်မှန်မှာ ရေခိုးရေငွေ့တွေတောင်ရိုက်သွားတယ်။ အဲဒါနဲ့ ဘာမှမမြင်ရတော့ တာကြောင့် မျက်မှန်ကိုချွတ်ပြီးလက်ကိုင်ပုဝါနဲ့ သုတ်နေရင်း ရန်ကုန်က မနက်ပိုင်းဆို ရေမွှေးနံ့၊ နှုတ်ခမ်းနီနံ့၊ ဟင်းနံ့တွေ၊ ညနေပိုင်းဆို ချွေးနံ့၊ အရက်နံ့တွေနဲ့ တထောင်းထောင်းထနေတတ်တဲ့ (Air-con) မဖွင့်တဲ့ (Air-con) ဘတ်(စ်)ကြီးတွေကိုသတိရလိုက်မိသေးတယ်။
ဘတ်(စ်)ကားပေါ်ကဆင်းပြီးရင်တော့MRT (Mass Rapid Transit) လို့ခေါ်တဲ့ မီးရထားဘူတာရုံကိုရောက်ပါပြီ။ ခုဏက e-z Link Card လေးနဲ့ပဲ ဘူတာထဲဝင် ရထားစောင့်ရပါတယ်။ ရထားဘယ်အချိန်ဝင်မယ်ဆိုတာကို ဘူတာအ၀င်ဝ မှာ ကတည်းက ဆိုင်းဘုတ်မှာ တစ်စီးပြီးတစ်စီးရေးပြထား ပါတယ်။ ၄မိနစ်၊ ၃မိနစ်၊ ၂မိနစ်၊ ၁မိနစ် ပြီးတော့ ရောက်ရမယ့်အချိန်ကျတာနဲ့ ဝေါကနဲထိုးစိုက်လာတတ် တဲ့ရထားကြီးတွေကိုကြည့်ပြီး ... မြန်မာစံတော်ချိန်ဆိုတဲ့စကားကို ဖြစ်ပေါ်စေခဲ့တဲ့ အမြဲတမ်းနောက်ကျတတ် တဲ့ ရန်ကုန်ဘူတာကြီးက ရထားကြီးတွေကို လွမ်းနေမိသေးတယ်။ စင်ကာပူမှာ ရထားစီးရတာ လေယာဉ်ပျံစီးရ သလိုပါပဲ။ ရထားလမ်းတွေတော်တော်များများက မိုးပေါ်မှာလေ။ ပြူတင်းပေါက်ကနေလှမ်းကြည့်ရင် အောက်မှာ ကားတွေနဲ့လူတွေ။ တစ်ခါတစ်ခါကျရင်တော့ ရထားကြီးက မြေအောက်ထဲ ရောက်သွားပြန်ရော။ စင်ကာပူနိုင်ငံကကျဉ်းတော့ ရထားတွေက မြို့တိုင်းလိုလိုကိုရောက်နိုင်တယ်လေ။
``ဂျုံးဂျုံး ... ဂျက်ဂျက် ... ဂျုံးဂျုံး ... ဂျက်ဂျက် ´´
``ဘော် ... ဘူ ... ဘော် ...´´
သံလမ်းကြီးတွေပေါ်မှာ ဘယ်ညာယိမ်းထိုးပြီး တဂျုံးဂျုံးတဂျက်ဂျက် ခုတ်မောင်းပြေးလွှားနေတဲ့ မီးရထားအိုကြီးတွေရဲ့ ဥသြဆွဲသံတွေကို ကျွန်တော်လွမ်းနေမိတယ်။ ရန်ကုန်မှာ ရထားစီးရင်တော့ အုပ်အုပ်ဆိုင်းဆိုင်းသစ်ပင်တွေ၊ တိုက်၊ တဲ၊ ပျဉ်ထောင်စတဲ့ အိမ်မျိုးစုံရဲ့ အနောက်ဘက်မြင်ကွင်းတွေ၊ တစ်ခါတစ်ခါ ခြောက်သွေ့တိတ်ဆိတ်နေတတ်တဲ့ ဘူတာရုံအိုလေးတွေ၊ ရထားလမ်းတစ်လျှောက်မှာ ပြေးလွှား လှုပ်ရှားနေကြတဲ့ အရွယ်စုံဈေးသည်တွေ၊ အချို့ဘူတာရုံလေးတွေရဲ့ ကြမ်းပြင်မှာ ရွှေရောင်အိပ်မက်တွေ မက်နေကြ တဲ့ အိမ်ယာမဲ့မိသားစုတွေ၊ စတဲ့ ... စတဲ့ မရိုးနိုင်တဲ့မြင်ကွင်းတွေကို ခင်ဗျားတို့ သံလမ်းတစ်လျှောက်လုံးမြင်နေကြရမှာလေ။ အခုတော့ ဒါတွေအားလုံးဟာ လွမ်းစရာလေးတွေ ဖြစ်ကုန်ပြီပေါ့ဗျာ။
စင်ကာပူမှာ တစ်ခါတစ်လေအချိန်လုသွားရပြီဆိုရင်တောTaxi ငှားရပြီပေါ့။ တွေ့တဲ့ တက္ကစီကိုတား တက်ထိုင်ပြီး သွားချင်တဲ့နေရာပြောလိုက်တာနဲ့ တန်းကိုမောင်းတော့တာပဲ။ တက္ကစီတိုင်းမှာက မီတာဖတ်တဲ့ စက်ကလေးတွေ တပ်ထားတယ်လေ။
``မြို့ထဲ ပန်းဆိုးတန်းလမ်းသွားချင်လို့ ဘယ်လောက်လဲ´´
``နှစ်ထောင်ပါ ...´´
``ဟာ ... များတယ်ဗျာ ... သွားနေကျ ... ၁၅၀၀တည်းပါ´´
``၁၈၀၀တော့ပေးပါဗျာ ... ဆီဈေးတွေကခေါင်ခိုက်နေလို့ပါ´´
``ဟင့်အင်း ... ဟင့်အင်း ... ၁၅၀၀ပဲ မရရင်မသွားဘူး´´
``ခင်ဗျား အဲဒီ့လိုလုပ်နေရင် ဒီနေ့ ပန်းဆိုးတန်းလမ်းတော့ ရောက်မှာမဟုတ်ဘူး။ ဒရိုက်ဘာတွေ ဆင်းရိုက်လို့ ပုဆိုးတန်းလန်းနဲ့ ထွက်ပြေးနေရလိမ့်မယ်´´
``၀ူး ...´´
``တောက် ... တက္ကစီဒရိုက်ဘာကများ ... ငါ့ကို ...´´
တစ်ခါက တက္ကစီငှားရင်း ဒရိုက်ဘာကအဲဒီ့လိုပြောသွားတာကိုခံလိုက်ရတဲ့ သူငယ်ချင်းတစ်ယောက် ရဲ့ အဖြစ်ကိုပြန်တွေး ကြည့်နေရင်း ရန်ကုန်က CITY TAXI လေးတွေကိုလွမ်းနေမိပြန်တယ်။ အဲဒီ့သူငယ်ချင်းကလည်းပြောချင်စရာပဲလေ ... သူကအမှတ်မရှိဘဲ နောက်ထပ် တက္ကစီတစ်စီးကိုပါ ၁၅၀၀ရမလားလို့ထပ်စစ်တော့ ... အဲဒီ့ တက္ကစီဒရိုက်ဘာက ဘာပြန်ပြောလည်းဆိုတော့ ...
``ဒီလောက်တောင် ၁၅၀၀ပေးချင်နေရင်လည်း အိမ်သာလိုက်ခဲ့ပေတော့ဗျို့´´ တဲ့ ...
ဒီမှာ ည၁၂နာရီကျော်တဲ့အထိ ဘတ်(စ်)ကားတွေက ပြေးဆွဲပေးတယ်လေ။ ကားတိုင်းကားတိုင်းရဲ့ ပထမဆုံးကားထွက်မယ့်အချိန်နဲ့ နောက်ဆုံးကားထွက်မယ့်အချိန်ကို ဂိတ်တိုင်းမှာရေးထားပေးတယ်။ တစ်ခါ ရန်ကုန်မှာတုန်းက ၆နာရီကျော်ရုံလေး မြို့ထဲကနေအိမ်ကိုကြားကားစီးပြီး ပြန်လာတုန်း ကားပေါ်မှာ ကြားခဲ့ဖူးတဲ့ ပြဿနာလေးတစ်ခုကို ကျွန်တော်ခဏခဏ ပြန်သတိရနေမိတတ်တယ်။
``အဘ ... အဘ ... နှစ်ဆယ်မဟုတ်ဘူး ... တစ်ယောက်ကို ၁၀၀ဗျ ...´´
``ဟေ ဘာတုန်းကွ ... ငါအမြဲစီးနေကျ ... ၂၀ပဲပေးရတာ´´
``အဘရယ် ... နာရီလည်းပြန်ကြည့်ပါဦး။ ၆နာရီကျော်နေပြီဗျ၊ ဒါ လိုင်းကားမဟုတ်တော့ဘူး၊ ကြားကားဖြစ်သွားပြီ´´
အဲဒီလို ၆နာရီကျော်တာနဲ့ဘ၀ပြောင်းသွားတတ်တဲ့ လိုင်းကားမျိုးတွေတော့ဒီမှာမရှိပါဘူး။ ရန်ကုန်မှာ ကြားကားစီးမိပြီဆိုရင် အိမ်ကိုအမြန်ပြန်ရောက်ချင်နေတဲ့ စိတ်တွေကို တတ်နိုင်သမျှလျှော့ထား နိုင်မှ အဆင်ပြေပါတယ်။ မှတ်တိုင်တစ်ခုခုမှာ လူမပြည့်သေးလို့ ရပ်စောင့်ပြီများဆိုရင်လေ ...
``လာ ... လာ ... စံပြဈေး ... စံပြဈေး ... သုံးယောက်ပဲလိုတော့တယ်နော် ...´´
``အခုထွက်မယ် ... တော်ကြာထွက်မယ် ... ထွက်ချင်မှထွက်မယ် ... လာထား ... လာထား ...´´
``လာနော် ... စဉ်းစားမနေနဲ့ တော်ကြာအိမ်ပြန်နောက်ကျလို့ ညစာငတ်နေဦးမယ်´´
ကျွန်တော်ကတော့ အပူအပင်သိပ်မရှိပဲ ပေါ့ပေါ့ပါးပါးနေတတ်တဲ့သူဆိုတော့ စပါယ်ယာတွေရဲ့ အဲဒီ့လို ပေါက်ကရလေးဆယ် စကားတွေကို နားထောင်ရင်း တစ်ယောက်ထဲ ပြုံးစိပြုံးစိဖြစ်နေတတ်တယ်။ ဒီမှာကတော့ စပါယ်ယာတွေရဲ့အသံတွေအစားTicketing Machine ရဲ့တတီတီမြည်သံကိုပဲ အခါခါကြားနေရတယ်။ အစစအရာရာဟာ အင်မတန်လွယ်ကူအဆင်ပြေလွန်းနေတော့လည်း ဘ၀ဟာ တကယ့်ကို ပျင်းစရာကောင်းပါတယ်ဗျာ။ တစ်ခုတော့ ရှိတယ်ဗျ။ အသေးအဖွဲပြဿနာလေးတွေမှာ အားအင်တွေခြွေသုံးလိုက်ရတော့ တကယ့် အခက်အခဲကြီးကြီးမားမားတွေနဲ့တွေ့တဲ့အခါ အကောင်းဆုံး အနေအထားတစ်ခုမှာ ရှိမနေနိုင်တာ မျိုးတွေတော့ ရှိတတ်တာပေါ့ဗျာ။
ရန်ကုန်မှာ ညကြီးမိုးချုပ် ကြားကားစီးပြီးလို့ အိမ်နားကိုအရောက် ကားပေါ်ကဆင်းလိုက်ပြီ ဆိုတာနဲ့ ဘဲလ်လေးတွေ ကလင် ... ကလင် တီးပြီး သူတို့ကိုများခေါ်မလားလို့ မျှော်လင့်တကြီးနဲ့ ၀ိုင်းကြည့်နေတတ်ကြတဲ့ ဆိုက်ကားဆရာတွေရဲ့မျက်နှာတွေကိုလည်း ဘတ်(စ်)ကားပေါ်ကဆင်းတိုင်း ကျွန်တော်လွမ်းနေမိသေးတယ်။ ရန်ကုန်မြို့ကြီးထဲမှာ မိုးလင်းကမိုးချုပ် ဟိုဟိုဒီဒီလျှောက်သွားနေရတာဟာ ရုပ်ရှင်ပြကွက်တွေကို တစ်ကွက်ပြီးတစ်ကွက်ကြည့်နေရသလိုပါပဲ။ ဘ၀အထွေထွေရဲ့ ပုံသဏ္ဍာန်အမျိုးမျိုး သော ဖြစ်တည်ရှေ့ဆက်နေမှုတွေဟာ စိတ်ဝင်စားစရာကောင်းသလို၊ တစ်ခါတစ်ခါ ရင်နင့်စရာလည်း ကောင်းပါတယ်။ ကျွန်တော့်ရင်ထဲမှာ အမြဲတမ်းတစိမ့်စိမ့်နဲ့ လွမ်းနေမိတာကတော့ နိစ္စဓူဝတွေ့မြင်နေရတဲ့ အယဉ်ကျေး၊ အသိမ်မွေ့ဆုံး မျက်လုံးတွေထဲက မပြည့်စုံခြင်းကွက်လပ်အပိုင်းအစတွေကိုပါပဲ။ စင်ကာပူမှာ ကတော့ မနက်မနက်ဆိုရင် သံပတ်ပေးပြီး လွှတ်လိုက်တဲ့ စက်ရုပ်တွေနဲ့ တူတဲ့လူတွေ ပြေးလွှားလှုပ်ရှားနေတာ မြင်နိုင်ပြီး၊ ညနေဆိုရင်တော့ သံပတ်လျှော့နေတဲ့စက်ရုပ်တွေ ပင်ပန်းတကြီး လေးတိလေးကန်နဲ့ အိမ်ပြန်ကြတဲ့မြင်ကွင်းတွေကိုနေ့တိုင်းမြင်ရမှာလေ။
ကျွန်တော့်ရဲ့ တောင်ရောက်မြောက်ရောက်အလွမ်းတွေက ခင်ဗျားတို့အတွက်တော့ ရယ်စရာဟာသတွေ ဖြစ်ကောင်းဖြစ်နေမှာပါ။ ကျွန်တော်ကတော့ အဲဒါတွေအားလုံးကို နှလုံးသားရဲ့ အနက်ရှိုင်းဆုံးတစ်နေရာကနေ နင့်နင့်သီးသီးကိုလွမ်းနေမိရင်း ဘ၀ဆိုတာ ကိုယ်တိုင် ရှင်သန်ရပ်တည် နေနိုင်ဖို့အတွက် ရုန်းကန်လှုပ်ရှားနေရခြင်းပါပဲဆိုတဲ့ သတ်မှတ်ချက်ထက်ပိုတဲ့ အဓိပ္ပါယ်တစ်ခုကို ရှာဖွေပြဌာန်းနိုင်ဖို့ ကြိုးစားနေမိပါတယ်။

5 comments:

Anonymous said...

တကယ်ကောင်းတဲ့ပို့စ်ပါ.. ပြန်ဖတ်သွားတယ်.. စင်ကာပူမှာနေတုန်းက Pasir Ris မှာနေခဲ့တာ လွမ်းဘူးလား.. =)
တကယ်လူတွေက စက်ရုပ်တွေလိုပဲနော်..
ကျွန်တော်ကတော့ အဲဒါတွေအားလုံးကို နှလုံးသားရဲ့ အနက်ရှိုင်းဆုံးတစ်နေရာကနေ နင့်နင့်သီးသီးကိုလွမ်းနေမိရင်း ဘ၀ဆိုတာ ကိုယ်တိုင် ရှင်သန်ရပ်တည် နေနိုင်ဖို့အတွက် ရုန်းကန်လှုပ်ရှားနေရခြင်းပါပဲဆိုတဲ့ သတ်မှတ်ချက်ထက်ပိုတဲ့ အဓိပ္ပါယ်တစ်ခုကို ရှာဖွေပြဌာန်းနိုင်ဖို့ ကြိုးစားနေမိပါတယ်။ <<< ဒီစာကြောင်းက မိုက်တယ်..

နေမိုး said...

သံဃာတော်များအား အားဖြည့်သည့်အနေဖြင့် မေတ္တာသုတ်ကို ရွတ်ဖတ်ပေးပါရန် လေးစားစွာ ပန်ကြားအပ်ပါသည်။

အောက်တွင် မေတ္တသုတ်ကို အသင့်ရှိနေသော အရှင်မဏိဇောတ ပူဇော်ရေးသားသည့် ပရိတ်ကြီး ၁၁သုတ် အသံထွက်ရွတ်ဖတ်နည်း စာအုပ်မှ ရွတ်ဖတ်လိုသူများ အလွယ်တကူရွတ်ဖတ်နိုင်စေရန် ပြန်လည်၍ ကူးယူဖော်ပြလိုက်ပါသည်။

ဒီနေ့သည် မြန်မာနိုင်ငံတွင် စစ်အာဏာရှင်စံနစ်ဆိုးအောက် ကျရောက်နေသော၊ ဒုက္ခဆင်းရဲခြင်း အမျိုးမျိုးကို ခံစားနေရသော မြန်မာနိုင်ငံသား ပြည်သူလူထုတရပ်လုံးအတွက် ကောင်းကျိုးချမ်းသာ ဖြစ်ပေါ်စေရေးကို ရည်စူးလျှက် ဗုဒ္ဓဘာသာ သံဃာတော်အရှင်မြတ်များမှ စစ်အစိုးရအား ငြိမ်းချမ်းစွာ ဆန့်ကျင်ဆန္ဒပြသည့် ပတ္တနိက္ကုဇ္ဇနကံဆောင်ပွဲကို တနိုင်ငံလုံးအ၀ှမ်း စတင်လိုက်ပြီဖြစ်ပါသည်။ ကျနော်တို့ မြန်မာနိုင်ငံသားအပေါင်းမှလည်း မိမိတို့တတ်နိုင်သမျှ စိတ်ဆန္ဒအင်အား၊ ကိုယ်ကာယအင်အားတို့ဖြင့် သံဃာတော်အရှင်သူမြတ်များနှင့်အတူ ပူးပေါင်းပါဝင်သင့်ပါသည်။ သံဃာတော်အရှင်မြတ်များအား အားဖြည့်သည့်အနေဖြင့် ကျနော်ကိုယ်တိုင်လည်းပဲ ဒီနေ့မှစတင်ပြီး အချိန်အားရခိုက်များတွင် ကြမ်းကြုတ်ရိုင်းစိုင်းနေသောသူများကို ယဉ်ကျေးပျော့ပျောင်းလာပါစေရန် မေတ္တာစိတ်ထား၍ ဗုဒ္ဓမြတ်စွာဘုရားရှင် ဟောကြားတော်မူသွားခဲ့သည့် တရားတော်များကို ရွတ်ဖတ်နေမည်ဖြစ်ပါသည်။

*****မေတ္တသုတ်*****
၁။ ယဿာနုဘာဝတော ယက္ခာ၊ (ယတ်သာနုဘာဝတော ယက်ခါ)
.....နေ၀ ဒေဿန္တိ ဘီသနံ။ (နေ၀ ဒတ်သင်တိ ဘီသနံ။)
.....ယဥှိ စေ၀ါနုယုဉ္ဇန္တော၊ (ယင်ညှိ စေ၀ါနုယုန်ဇန်တော။)
.....ရတ္တိန္ဒိဝ မတန္ဒိတော။ (ရတ်တိန်ဒိဝ မ တန်ဒိတော။)

၂။ သုခံ သုပတိ သုတ္တော စ၊ (သုခံ သုပတိ သုတ်တော စ၊)
.....ပါပံ ကိဉ္စိ န ပဿတိ။ (ပါပံ ကိန်စိ န ပတ်သတိ။)
.....ဧ၀မာဒိ ဂုဏူပေတံ၊ (အေ၀မာဒိ ဂုဏူပေတံ။)
.....ပရိတံ္တ တံ ဘဏာမ ဟေ။ (ပရတ်တံ တံ ဘဏာမ ဟေ။)

၃။ ကရဏီယာ မတ္တကုသလေန၊ (ကရဏီယာ မတ်ထကုသလေန၊)
.....ယန္တသနံ္တပဒံ အဘိသမေစ္စ။ (ယန်တ သန်တံ ပဒံ အဘိသမစ်စ။)
.....သက္ကော ဥဇူ စ သုဟုဇူ စ၊ (သက်ကော ဥဇူ စ သုဟုဇူ စ၊)
.....သုဝစော စဿ မုဒု အနတိမာနီ၊ (သု ၀စော စတ်သ မုဒု အနတိမာနီ။)
(အန-တိမာနီဟု မရွတ်ပါနှင့်၊ အနတိမာနီဟု တဆက်တည်း ရွတ်ပါ။)

၎။ သန္တုဿကော စ သုဘရော စ၊ (သန်တုတ်သကော စ သုဘရော စ၊)
.....အပ္ပကိစ္စော စ သလ္လဟုက၀ုတ္တိ။ (အပ်ပကိတ်စော စ သန်လဟုက၀ုတ်တိ)
.....သန္တိန္ဒြိယော စ နိပကော စ၊ (သန်တိန်ဒရိယော စ နိပကော စ)
.....အပ္ပဂဗ္ဘော ကုလေသွ န နုဂိဒ္ဓေါ။ (အပ်ပဂတ်ဘော ကုလေသွ န နုဂိတ်ဓော)
(အပ္ပ-ဂတ်ဘော ဟုမရွတ်ပါနှင့်၊ အပ်ပဂတ်ဘောဟု ရွတ်ပါ။)

၅။ န စ ခုဒ္ဒ မာစရေ ကိဉ္စိ (န စ ခုတ်ဒ မာစရေ ကိန်စိ)
.....ယေန ၀ိညူ ပရေ ဥပ၀ဒေယျုံ။ (ယေန ၀ိညူ ပရေ ဥပ-၀ဒေယုံ)
.....သုခိနောဝ ခေမိနော ဟောန္တု၊ (သုခိနောဝ ခေမိနော ဟွန်တု)
.....သဗ္ဗသတ္တာ ဘ၀န္တု သူခိသတ္တာ။ (သတ်ဗ သတ်တာ ဘ၀န်တု သုခိတတ်တာ)

၆။ ယေ ကေစိ ပါဏဘူတတ္ထိ၊ (ယေ ကေစိ ပါဏဘူတတ်ထိ)
.....တသာ ၀ါ ထာဝရ၀ န၀သေသာ။ (တသာ ၀ါ ထာဝရာဝ န၀သေသာ)
.....ဒီဃာ ၀ါ ယေ၀ မဟန္တာ၊ (ဒီဃာ ၀ါ ယေ၀ မဟန်တာ)
.....မဇ္စျိမာ ရဿကာ အဏုကထူလာ။ (မစ္စ်ိမာ ရတ္သကာ အဏုကထူလာ)

၇။ ဒိဋ္ဌာ ၀ါ ယေ၀ အဒိဋ္ဌာ၊ (ဒိတ်ထာ ၀ါ ယေ၀ အဒိတ်ထာ)
.....ယေ၀ ဒူရေ ၀သန္တိအ၀ိဒူရေ။ (ယေ၀ ဒူရေ ၀သန်တိ အ၀ိဒူရေ)
.....ဘူတာဝ သမ္ဘဝေသီဝ၊ (ဘူတာ-၀ သမ်ဘဝေသီ-၀)
.....သဗ္ဗသတ္တာ ဘ၀န္တု သုခိတတ္တာ။ (သတ်ဗ-သတ်တာ ဘ၀န်တု သုခိတတ်တာ)

၈။ န ပရော ပရံ နိကုဗ္ဗေထ၊ (န-ပရော ပရံ နိကုပ်ဗေထ)
.....နာတိမညေထ ကတ္ထစိ န ကဉ္စိ။ (နာတိမင်ညေထ ကတ်ထစိ န-ကင်စိ)
.....ဗျာရောသနာ ပဋ္ဋိဃသည၊ (ဗျာရောသနာ ပတိယ သင်ည)
.....နာညမညဿ ဒုက္ခ မိစ္ဆေယျ။ (နင်ညမင်ညတ်သ ဒုတ်ခ မိတ်ဆေယ)

၉။ မာတာ ယထာ နိယံပုတ္တ၊ (မာတာ ယထာ နိယံပုတ်တ)
.....မာယုသာ ဧကပုတ္တ မနုရက္ခေ။ (မာယုသာ အေက-ပုတ်တ မနုရတ်ခေ)
.....ဧ၀မ္ပိ သဗ္ဗဘူတေသု၊ (အေ၀မ်ပိ သတ်ဗဘူတေသု)
.....မာနသံ ဘာဝယေ အပရိမာဏံ။ (မာနသံ ဘာဝယေ အ-ပရိမာဏံ)

၁၀။ မေတ္တဉ္စ သဗ္ဗလောကသ္မိ၊ (မစ်တင်စ သတ်ဗလောက-သမိ)
.....မာနသံ ဘာဝယေ အပရိမာဏံ။ (မာနသံ ဘာဝယေ အပရိမာဏံ)
.....ဥဒ္ဓံ အဓော စ တိရိယဉ္စ၊ (အုတ်ဓံ အဓော စ တိရိယင်စ)
.....အသမ္ဗာဓံ အဝေရ မသပတ္တံ။ (အ-သတ်ဗာဓံ အဝေရ မ-သပတ်တံ)

၁၁။ တိဋ္ဌံ စရံ နိသိန္နော ၀၊ (တိတ်ထံ စရံ နိသန်နော ၀)
.....သယာနော ယာဝတာဿ ၀ိတမိဒ္ဓေါ။ (သယာနော ယာဝတတ်သ ၀ိတ-မိတ်ဓော)
.....ဧတံ သတိံအဓိဋ္ဌေယျ၊ (အေတံ သတိန် အဓိတ်ထေယ)
.....ဗြဟ္မ မေတံ ၀ိဟာရ မိဓ မာဟု။ (ဗြန်မ မေတံ ၀ိဟာရ မိဓ မာဟု)

၁၂။ ဒိဋ္ဌိဉ္စ အနုပဂ္ဂမ္မ၊ (ဒိတ်ထိန်စ အနုပက်ဂမ်မ)
.....သီလ၀ါ ဒဿနေန သမ္ပန္နော။ (သီလ၀ါ ဒတ်သနေန သမ်ပန်နော)
.....ကာမေသု ၀ိနယ ဂေဓံ၊ (ကာမေသု ၀ိနယ ဂေဓံ)
.....နဟိ ဇာတု ဂ္ဂဗ္ဘသေယျ ပုန ရေတိ။ (န-ဟိဇာတုတ် ဂတ်ဘ သေယ ပုန ရေတိ)
မေတ္တသုတ္တံ နိဋ္ဌိတံ။

MELODYMAUNG said...

“အဲဒါတွေအားလုံးကို နှလုံးသားရဲ့ အနက်ရှိုင်းဆုံးတစ်နေရာကနေ နင့်နင့်သီးသီးကိုလွမ်းနေမိရင်း” ရေးထားတာဆိုတော့ ဒီကွန့်မန့် လေးဝင်ရေးမိတာ အားနာသလိုလိုတော့ ရှိသား ဒါပေသိ ရေးပါရစေဦး

`ဟင့်အင်း ... ဟင့်အင်း ... ၁၅၀၀ပဲ မရရင်မသွားဘူး´ ဆိုတဲ့ ပြောစကားလေးကို ရွတ်ကြည့်ရင်း `ဒီလောက်တောင် ၁၅၀၀ပေးချင်နေရင်လည်း အိမ်သာလိုက်ခဲ့ပေတော့ဗျို့´´ တဲ့ ...ဆိုတဲ့ တက္ကစီဒရိုက်ဘာရဲ့ စကားကိုကြည့်တော့ အဲဒီသူငယ်ချင်းက မိန်းကလေးဖြစ်ရင်ဖြစ် လို့ စဉ်းစားပေမဲ့လဲ “ပုဆိုးတန်းလန်းနဲ့ ထွက်ပြေးနေရလိမ့်မယ်´´ ဆိုတာလဲ ပြန်ဖတ်မိတော့ အဟိ နဘလတို့ တယ်ရင်းက တခုခုတော့ ထူးသဗျ
(စတာပါ)

ဘ၀ဆိုတာ ကိုယ်တိုင် ရှင်သန်ရပ်တည် နေနိုင်ဖို့အတွက် ရုန်းကန်လှုပ်ရှားနေရခြင်းကတော့ အဓိက အချက်ဖြစ်မှာပါလေ။

NayPhoneLatt said...

သူငယ်ချင်းက ယောင်္ကျားလေးဗျ ... ကားသမားက သူ့ကို ယောင်္ကျားအချင်းချင်း အဲလိုကြီးပြောသွားလို့ ဒီကောင် တော်တော်တင်းသွားတာ ... ဟား ဟား

Anonymous said...

ရေခြားမြေခြားကို မရောက်ဖူးပေမယ့် ခဏသွားကြည့်လိုက်ရသလိုပဲ တကယ့်အလွမ်းကို ခံစားမိပါတယ်။ သူလွမ်းတာတွေကိုလည်း လွမ်းသလို ကိုယ်လွမ်းစရာတွေကိုလည်း လွမ်းမိတယ်။ အရမ်းကောင်းပါတယ်။