ကျွန်တော်နှင့် ဘားကမ့် (Barcamp)

ကျွန်တော်နှင့် ဘားကမ့် (Barcamp)

ဒီနှစ် ဖေဖော်ဝါရီ ၄ရက်နဲ့ ၅ရက်နေ့တွေမှာ မန္တလေးဘားကမ့်၊ ဖေဖော်ဝါရီ ၁၁ရက်နဲ့ ၁၂ရက်နေ့တွေမှာ ရန်ကုန်ဘားကမ့်တို့ကို အောင်အောင်မြင်မြင်နဲ့ ကျင်းပနိုင်ခဲ့ပါတယ်။ ကျွန်တော်ကိုယ်တိုင်လဲ မန္တလေးမှာ တစ်ရက်၊ ရန်ကုန်မှာနှစ်ရက် ပူးပေါင်းပါဝင်ဆွေးနွေးဖြစ်ခဲ့ပါတယ်။ ဘားကမ့် (Barcamp) ဆိုတာက တက်ရောက်သူတွေအားလုံး ဟောပြောချင်သူရော၊ နားထောင်ချင်သူတွေပါ လွတ်လပ်စွာ၊ ရင်းနှီးပွင့်လင်းစွာနဲ့ အသိပညာ၊ အတတ်ပညာတွေ ဖလှယ်ရယူနိုင်တဲ့ပွဲမျိုးပါ။ တစ်နေ့တာရဲ့အချိန်အပိုင်းအခြားလေးတွေနဲ့ ဟောပြောနိုင်တဲ့ အခန်းလေးတွေကို တွဲလျက်ကပ်ပေးထားတဲ့ Board တစ်ခုရှိပြီး တက်ရောက်လာသူတွေထဲ ကမည်သူမဆိုဟာ ကိုယ်မျှဝေချင်တဲ့ အကြောင်းအရာနဲ့ ပြောမယ့်သူနာမည်ကို စာရွက်တောင်းရေးပြီး ပြောချင်တဲ့အခန်း ပြောချင်တဲ့အချိန် ဆုံတဲ့အကွက်မှာ ကပ်လိုက်ဖို့ပါပဲ။ ဒါဆို အဲဒီ့ Board ကိုလာကြည့်တဲ့သူတွေကလည်း ဘယ်သူက ၊ ဘယ်အခန်းမှာ၊ ဘယ်အချိန်၊ ဘာအကြောင်းပြောမယ် ဆိုတာတွေကို သိသွားပြီး ကိုယ်စိတ်ဝင်စားတယ်ဆိုရင် အဲဒီ့အခန်းကို သွားနားထောင်လိုက်ရုံပါ …။ နိုင်ငံတကာက Barcamper တွေအတွက် ဘာသာပြန်သူတွေ စီစဉ်ပေးထားသလို … အိုင်တီမကျွမ်းကျင်သူတွေ အတွက်လည်း ပြောချင်တာပြောနိုင်ဖို့ နည်းပညာ ပိုင်းဆိုင်ရာ အထောက်အကူပြုပေးမယ့်သူတွေ ထားပေးထားပါတယ် …။

ကျွန်တော်တို့နိုင်ငံမှာ ဘားကမ့်ပွဲလေးတွေ ကျင်းပဖြစ်နေပြီဆိုတဲ့အကြောင်းကို အထဲမှာ ကတည်းက ဂျာနယ်တွေဖတ်ပြီး သိနေခဲ့ပါတယ်။ အဲဒီ့ကတည်းက စိတ်ထဲမှာ ရွစိရွစိဖြစ်နေခဲ့တာပါ …။ ပါဝင်ဆောင်ရွက်နေကြတဲ့သူတွေထဲ မှာလည်းကိုယ့်ရဲ့ သူငယ်ချင်း  တွေကိုတွေ့နေရတော့ ပိုဆိုးတာပေါ့ …။ ပထမအကြိမ်နဲ့ ဒုတိယအကြိမ် ရန်ကုန်ဘားကမ့် တွေနဲ့ ပထမအကြိမ်မန္တလေးဘားကမ့်တို့ကို အထဲကနေပဲ လှမ်းလွမ်းရင်းဖြတ်သန်းခဲ့ရတယ်။ အခုတော့ ကံကောင်းထောက်မစွာနဲ့ ဘားကမ့်နှစ်ခုစလုံးအမီ အပြင်ပြန်ရောက်လာနိုင်ခဲ့လို့ နှစ်ခုစလုံးကို ကိုယ်တိုင်ကိုယ်ကျ ပူးပေါင်းပါဝင်ဆင်နွှဲခွင့်ရခဲ့ပါတယ် …။ မန္တလေးဘားကမ့်ကိုသွားတုန်းကတော့ တစ်ခုခု ၀င်ပြောဖို့အစီအစဉ်မရှိခဲ့ပါဘူး။ ဒါပေမယ့် တစ်ခုခုပြောပါလားလို့ ၀ိုင်းပြောကြတာနဲ့ ပြောချင်နေတဲ့ခေါင်းစဉ် တစ်ခုကို ကမမ်းကတမ်း ပဲ ပြင်ဆင်ပြီး ပြောဖြစ်ခဲ့တယ်။ မန္တလေးမှာ ပြောဖြစ်ခဲ့တဲ့ ခေါင်းစဉ်က တိုင်းပြည်တည်ဆောက်ရေး လုပ်ငန်းမှာ အချိတ်အဆက် မိဖို့အရေးကြီးတယ်ဆိုတဲ့အကြောင်းလေးပါ … ။အင်္ဂလိပ်လို (Connection in State Building Process) လို့ နာမည်ပေးဖြစ်ခဲ့တယ်။ အဓိက က တိုင်းပြည်တစ်ခုရဲ့ အုပ်ချုပ်ရေး၊ တရားစီရင်ရေး၊ ဥပဒေပြုရေး၊ မီဒီယာနဲ့ ပြည်သူဆိုတဲ့ မဏ္ဍိင်ငါးရပ်ရဲ့ အချင်းချင်းချိတ်ဆက်မှုအားကောင်းနေမှ ဒီမိုကရေစီစနစ်တစ်ခု အားကောင်းစွာနဲ့ဖြစ်ပေါ်လာနိုင်မယ့်အကြောင်း၊ အဲဒီ့ ချိတ်ဆက်မှုတွေကို ခိုင်မာသထက်ခိုင်မာအောင် မြန်သထက်မြန်အောင်လုပ်နိုင်မှ ဒီမိုကရေစီ စနစ်တစ်ခု အဓွန့်ရှည် တည်တံ့မယ့် အကြောင်းတွေပြောဖြစ်ပါတယ် …။ ပြီးတော့ … အိုင်တီကို စိတ်ဝင်စားတဲ့ လူငယ်တွေအနေနဲ့ မဏ္ဍိင်ငါးခုထဲက မီဒီယာနဲ့ ပြည်သူဆိုတဲ့ မဏ္ဍိင်နှစ်ခုကို ကိုယ်စားပြုနေ တာကြောင့် အဲဒီ့မဏ္ဍိင်နှစ်ခုရဲ့ တာဝန်တွေကို လေ့လာပြီး ကျေပွန်အောင်ထမ်းဆောင်ကြဖို့လဲ တိုက်တွန်းဖြစ်ခဲ့ပါတယ် …။ အခုခေတ်မှာ CJ (citizen journalist) ဆိုတဲ့စကားခေတ်စား လာသလို နိုင်ငံသားတိုင်းဟာ မီဒီယာသမားတစ်ပိုင်းဖြစ်နေတဲ့ ခေတ်ကို ရောက်နေပါပြီ …။ ဒါကြောင့်လဲ ကျွန်တော်က လူငယ်တွေကို မဏ္ဍိင်နှစ်ခုစာ တာဝန်ရှိတယ်လို့ ပြောခဲ့တာပါ …။ မန္တလေးဘားကမ့်ကို တစ်ရက်ပဲ တက်ရောက်နိုင်ခဲ့ပြီး အထဲမှာရင်းနှီးခဲ့တဲ့ အကိုတော်တစ်ယောက်ရဲ့ ဖိတ်ကြားချက်အရ မကွေးတိုင်းက မြစ်ခြေကျေးရွာစုလေးဆီခရီးဆက်ခဲ့ရပါတယ် …။ အဲဒီ့ခရီးစဉ် အကြောင်း ကိုတော့ နောက်အလျင်းသင့်ရင် ခရီးသွားဆောင်းပါးသဘောမျိုးလေးရေးပါဦးမယ် …။

ရန်ကုန်ဘားကမ့် ကိုတော့ ၁၁ရက်နဲ့ ၁၂ရက်နေ့တွေ မှာ နှစ်ရက်စလုံး တက်ရောက်ဖြစ် ခဲ့ပါတယ်…။ ပြောတာကလည်း ပထမနေ့ရော၊ ဒုတိယနေ့မှာပါ ၀င်ပြောဖြစ်တယ်။ ပထမနေ့ကတော့ မန္တလေးမှာပြောဖြစ်ခဲ့တာကိုပဲ နည်းနည်းထပ်ချဲ့ပြီး ဗဟိုဦးစီးချုပ်ကိုင်မှုလျှော့ချခြင်း (Decentralization) ခေါင်းစဉ်နဲ့ပြောဖြစ်ခဲ့တယ် ...။ ကျွန်တော်တို့နိုင်ငံမှာ အရင်ကရှိခဲ့တဲ့ ဗဟိုကနေအရာရာကိုချုပ်ကိုင်တဲ့ စနစ်ကနေ အခုတော့ ဗဟိုဖြစ်တဲ့အုပ်ချုပ်ရေးက အခြားမဏ္ဍိင်တွေနဲ့ တပြေးညီဖြစ်သွားတဲ့ ဒီမိုကရေစီစနစ်ကို ပြောင်းသွားပြီဆိုတဲ့အကြောင်း၊ အဲဒီ့စနစ်မှာ မဏ္ဍိင်တွေရဲ့ အပြန်အလှန် စောင့်ကြည့်၊ ချိန်ညှိမှု (Raciprocal check & balance) သိပ်ကိုအရေးကြီးတဲ့အကြောင်း မဏ္ဍိင်တစ်ခုက အခြားတစ်ခုကို ပစ်ထားလို့မရတဲ့ အကြောင်း၊ အထူးသဖြင့် အဓိက မဏ္ဍိင်ဖြစ်တဲ့ ပြည်သူလူထုက အခြားမဏ္ဍိင်တွေကို ပစ်မထားပဲ အားကောင်းကောင်းနဲ့ ချိတ်ဆက်ထား သင့်ကြောင်းတွေ ပြောဖြစ်ပါတယ် ...။ အားလုံးက စိတ်ဝင်တစားနဲ့ နားထောင်တဲ့ အပြင်မေးခွန်းတွေနဲ့ မေးမြန်းဆွေးနွေးကြတဲ့အတွက် ၀မ်းမြောက်ဝမ်းသာဖြစ်ရပါတယ် ...။ ဒုတိယနေ့မှာတော့ ကျွန်တော်တို့သူငယ်ချင်းတွေ စုပြီးတိုင်ပင်ထားကြတဲ့ အိုင်တီနည်းပညာ ဖွံ့ဖြိုးတိုးတက်ရေး အတွက် ၀ိုင်းလုပ်ကြမယ် အဖွဲ့အစည်းလေးအကြောင်းနဲ့ လုပ်ဖို့ရည်ရွယ်ထားတဲ့ လုပ်ငန်းစဉ်လေးတွေ အကြောင်းကို ဆွေးနွေးဖြစ်ခဲ့ပြီး ... တက်ရောက်လာကြတဲ့သူတွေထဲက ပူးပေါင်းပါဝင်ချင်ကြတဲ့သူတွေကို ဖိတ်ခေါ်ခဲ့တဲ့အခါမှာ လူငယ်တော်တော်များများက အားတက် သရောနဲ့ စိတ်ဝင်တစားစာရင်းပေးကြတာကို တွေ့ရပါတယ်။ ရှေ့ဆက်လုပ်မယ့် နည်းပညာပြန့်ပွားရေး လုပ်ငန်းတွေအတွက် အားတက်ရသလို ... လူငယ်တွေရဲ့ တိုင်းပြည်ကိုတိုးတက်စေချင်တဲ့ စိတ်ထားနဲ့ ပညာကိုမျှဝေချင်ကြတဲ့ စေတနာတွေ ကို  တွေ့လိုက်ရတဲ့အတွက်လဲ ... အင်မတန်ကိုကြည်နူးကျေနပ်ရပါတယ် ...။

 အရင်နှစ်တွေတုန်းက ရန်ကုန်ဘားကမ့်မှာ အိုင်တီနဲ့ဆိုင်တဲ့ခေါင်းစဉ်တွေ ပဲများတယ်လို့ ပြောတာ ကြားရပေမယ့် အခုနှစ်မှာတော့ အိုင်တီနယ်နဲ့မဆိုင်တဲ့ အခြားသောခေါင်းစဉ်လေးတွေ ( ဥပမာ ။ မြန်မာ့စစ်တုရင်၊ လွှတ်တော်တွင် အိုင်တီနှင့်ပတ်သက်ပြီး ကျွန်တော်(တို့)ပြောဆိုဆွေးနွေးစေချင်တဲ့ အကြောင်းများ၊ ဆိုက်ကား ) ကိုတွေ့ရပါတယ်။ မန္တလေးမှာတော့ အိုင်တီနဲ့မဆိုင်တဲ့ နယ်ပယ်က ၀င်ပြောတာတွေပိုများတာကိုတွေ့ရပါတယ်။ ဒါကလည်း ကျွန်တော်တို့တွေရဲ့ သတင်းပေးမှုအားနည်း တာကြောင့်လဲ ဖြစ်နိုင်ပါတယ်။ Barcamp ဆိုတာ နည်းပညာဆိုင်ရာ ဘာသာရပ်တွေကိုပဲ ပြောဆိုဆွေးနွေးတဲ့နေရာမဟုတ်ဘူး၊ ဘယ်လိုကဏ္ဍမျိုး မဆို ကိုယ်ကလည်းမျှဝေဖို့ အဆင်သင့်ဖြစ်မယ် နားထောင်ချင်တဲ့သူတွေကလည်း စိတ်ဝင်စားကြမယ် ဆိုရင် ကိုယ်သိထားသမျှ၊ တတ်ထားသမျှတွေကို ပြောဆိုဆွေးနွေးနိုင်၊ မျှဝေနိုင်တဲ့နေရာလေးဖြစ်တယ် ဆိုတာကို ဒီ့ထက်ပိုပြီးလူသိအောင် ကျွန်တော်တို့လုပ်နိုင်မယ်ဆိုရင် နောက်နောင်နှစ်တွေမှာ ကဏ္ဍစုံပါဝင်ဆွေးနွေးကြတဲ့ ပွဲလေးဖြစ်လာပြီး ပိုပြီး စည်စည်ကားကားလေးဖြစ်လာမယ်ထင်ပါတယ်။ ကျွန်တော်လဲ အပြင်ပြန်ရောက်လာပြီဆိုတော့ နောက်နှစ် Barcamp ပွဲလေးတွေမှာ ဒီထက်ပိုပြီး ၀ိုင်းလုပ်ပေးနိုင်ဖို့မျှော်လင့်ရပါတယ်...။

ဒီနှစ်ရန်ကုန်ဘားကမ့်ရဲ့ထူးခြားချက်ကတော့ ဖွင့်ပွဲအခမ်းအနားကို အန်တီကိုယ်တိုင်လာပြီး ဖွင့်ပေးသွားတဲ့အချက်ပါ ...။ အန်တီလာပြီးဖွင့်ပေးသွားတဲ့အချက်အပေါ် အခြားသူတွေ ဘယ်လိုသဘောထား သလဲတော့မသိပါဘူး ။ ကျွန်တော်ရဲ့အမြင်ကတော့ ဦးစီးကျင်းပသူတွေ၊ စီစဉ်သူတွေအနေနဲ့ ပိုပြီးတာဝန်ကြီး သွားတယ်လို့ မြင်ပါတယ်။ အန်တီ 2012 Barcamp Yangon ဖွင့်ပွဲအခမ်းအနားမှာပြောသွားတဲ့ မိန့်ခွန်းကို ကြည့်မယ်ဆိုရင် အန်တီ့အနေနဲ့ ဒီလိုလွတ်လပ်မှုကို အသားပေးတဲ့ ပွဲမျိုးလေးကို အလွန်စိတ်ဝင်စားပြီး ၊ အများကြီးလဲ မျှော်လင့်တယ်ဆိုတာ သိသာပါတယ် ...။  ဒါကြောင့် ကျွန်တော်တို့တွေ ပိုပြီးတာဝန်ကြီး သွားတယ်လို့ပြောတာပါ။ အန်တီကဖွင့်ပေးသွားခဲ့ပြီး နောက်ပိုင်းမှာ ဖြစ်ချင်တိုင်းဖြစ်နေမယ်ဆိုရင် အလကားပါပဲ ...။ ဒီလိုပြောလို့ ဒီနှစ်ရန်ကုန်ဘားကမ့်ပွဲဟာ မအောင်မြင်ဘူးလို့ ကျွန်တော်မဆိုလိုပါဘူး ...။ အောင်မြင်ပါတယ် ...။ ဒါပေမယ့် ပြောစရာတွေ၊ လိုအပ်တာတွေ၊ ဒီထက်ပိုပြီး တိုးတက်အောင်လုပ်လို့ ရတာတွေ ရှိနေပါတယ်။ ပြောစရာတွေများစွာထဲကမှ အဓိကအချက်ကတော့ အင်တာနက်မရခြင်းပါပဲ ... အိုင်တီသမားတွေ ဦးစီးကျင်းပတဲ့ အိုင်တီပွဲကြီးဖြစ်ပြီး အင်တာနက်သုံးမရတာဟာ စိတ်ပျက်စရာပါ ...။ ကြော်ငြာတွေမှာတုန်းက ဘယ်သူမဆို Free internet access ရမယ်လို့ ကြေငြာထားပြီး တကယ့်လက်တွေ့မှာ မီဒီယာကော်နာကလူတွေတောင် ပုံတွေအလျှင်မီအောင် မတင်နိုင်တာ ဆိုးပါတယ် ...။ နောက်တစ်ခုက လူများပြီးပွဲမစည်တဲ့ကိစ္စပါ ...။ organiser တင် ၅၀ ကျော်တယ်လို့သိရပါတယ် ...။ ဒါပေမယ့် တစ်ယောက်နဲ့တစ်ယောက်လဲမသိ၊ organiser နဲ့ volunteer တွေကလည်း အချိတ်အဆက်မမိ၊ ဘယ်သူက ဘယ်မှာ တာဝန်ရှိတယ်ဆိုတာမျိုးလဲ သေချာမရှိပဲ ... mis-management  သဘောမျိုးလေးတွေ အများကြီး တွေ့ရပါတယ် ...။ နောက်ပြီး တာဝန်တစ်ခုကိုသေချာထမ်းဆောင်နေကြသူတွေရှိပေမယ့် ... ဟိုယောင်ဒီယောင်တွေများနေသလားလို့ပါ ...။ ဒါကလည်း မလိုအပ်ပဲ လူများနေတော့ သူလုပ်နိုးနိုး ငါလုပ်နိုးနိုးနဲ့  ဟာကုန်တဲ့သဘောတွေပါ ...။ organizer တွေထဲမှာ လူငယ်တွေများတဲ့ အတွက် ဖြစ်လာတဲ့ ပြသနာတွေကိုဖြေရှင်းတဲ့နေရာမှာ ... စမတ်ကျကျမရှင်းတတ်ပဲ ... မလိုအပ်တဲ့ conflict လေးတွေဖြစ် လာတာကို တွေ့ရပါတယ် ...။ ကျွန်တော်က အပြင်လူတစ်ယောက်အနေနဲ့ အားလုံးရဲ့ ဝေဖန်ချက်တွေကို လိုက်နားထောင်နေတော့ ... ပြုပြင်စရာ၊ သတိထားစရာလေးတွေကို အများကြီးကြားခဲ့ရပါတယ် ...။ အကျီတွေ လွယ်လွယ်ထုတ်မရတာကအစ၊ Registration လုပ်တာကို Online နဲ့ Offline ခွဲခြားဆက်ဆံတာအဆုံးပေါ့ ...။

တကယ်တမ်းကျတော့ ဘားကမ့်ပွဲဆိုတာ တက်ရောက်လာသူတွေထဲက မည်သူမဆိုဟာ  ဦးဆောင်ဆွေးနွေးဟောပြောသူ ဖြစ်နိုင်သလိုပဲ ၊ နားထောင်လေ့လာသူလဲ ဖြစ်နိုင်ပါတယ် ...။ ဒါကြောင့် တစ်ခုခုကို ဦးဆောင်ဆွေးနွေးမယ်ဆိုရင်လဲ ကိုယ့် Topic ကိုလူစိတ်ဝင်စားအောင် တင်ပြဆွေးနွေးနိုင်ဖို့အတွက် သေသေချာချာလေ့လာ ပြင်ဆင်ထားသင့်သလို၊ အခြားသူတွေပြောတာ ကို နားထောင်လေ့လာတဲ့အခါမှာလဲ အထူးအာရုံစိုက်ပြီး  သေချာနားထောင်လေ့လာ သင့်ပါတယ်။ ပြောတဲ့နေရာမှာလဲ သေချာပြင်ဆင်မှုမရှိ၊ ကိုယ်တကယ်ပိုင်နိုင်တဲ့ Topicကိုလဲမရွေးချယ် ၊ နားထောင်တဲ့အခါမှာလဲ ဟိုအခန်းခဏသွား ၊ ဒီအခန်းခဏသွားလုပ်နေပြီး ထိုင်နားထောင်နေတဲ့ အခါတွေမှာ သေချာအာရုံစိုက်မှုမရှိဘူးဆိုရင်တော့ ဘာမှမရပဲ ခြေညောင်းအချိန်ကုန်တာပဲ အဖတ်တင်ပါလိမ့်မယ် ...။ နောက်ပိုင်းနှစ်တွေမှာ ဒီ့ထက်ဒီ့ထက်ပိုပြီး ထိရောက်စည်ကားတဲ့ Barcamp ပွဲတွေကိုဆက်လက်ပြီးကျင်းပနိုင်ဖို့ ကျွန်တော်တတ်နိုင်တဲ့ ဘက်က ပါဝင်ကူညီဖို့ စိတ်ကူးမိပြီး ... စာဖတ်သူညီငယ်ညီမငယ်တွေကိုလဲ ပူးပေါင်းပါဝင်ကြဖို့ ဖိတ်ခေါ်လိုပါတယ် ...။

နေဘုန်းလတ်

www.nayphonelatt.com

 ဖူးငုံ(Teen)မဂ္ဂဇင်း မတ်လထုတ်မှာရေးဖြစ်ခဲ့တဲ့ စာမူလေးပါ ။     ။